በመጽሐፍ ቅዱስ እይታ "ባርያ" ማለት ምን ማለት ነው?

ወዳጆች ሆይ፦ በቅድስት ድንግል ማርያም ልጅ  በጌታችን በኢየሱስ ክርስቶስ ሠላምና ፍቅር ይሁንላቹ!

* በመጽሐፍ ቅዱስ ባርያ ማለት በብዙ መንገድ የየራሱ ታሪክና ጥልቅ የሆነ ሐተታን ቢጠይቅም እኔ ግን እግዚአብሔር እንደ ፍቃድ በሦስት አበይት የሥራ አገልግሎት እይታ እንመለከተው ዘንድ እነሆ፦

1ኛ፦ በፊት በነበረው እርዮተ ዓለም ለምድራዊ የሥራ አገልግሎት ሰዎቹን በቅጥር መልክ ሳይሆን በአስገባሪዎች አማካኝነት የባርነትን ስራ እንደ ህጋዊነት ይሸጡ ይለውጡ እንደነበር  መጽሐፍ ቅዱስ እንዲ ብሎ ይገልጽልናል “በብር የተገዛ ባርያ” /ዘጸ 12፥44/ እንዲል!  

2ኛ፦ በባርነት ሳይፈልጉና ሳይፈቅዱ በግዳጅ ያለምንም ክፍያ እንዲያውም እየተደበደቡ፣ ስቃይና መከራ እየተቀበሉ፣ እየተገደሉ፣በሚወልዷቸውም ልጆች ጭምር ዓይናቸ እያየ፣ በመሪር ልቅሶና እሪታ አንጀታቸው እየተላወሰ ወንድ ልጆቻቸው ለሞት፥ ሴት ልጆቻቸውን ደግሞ፤ በጽኑ ሥራ፥ በጭቃ፥ በጡብም በእርሻም ሥራ ሁሉ፥ በመከራም በሚያሠሩአቸው ሥራ ሁሉ፥ ሕይወታቸውን ያስመርሩአቸው እንደነበር፥ እንዲሁም ግብፃውያን የእስራኤልን ልጆች በመከራ እንደገዙአቸው። መጽሐፍ ቅዱስ በሰፊው ያትትልናል። /ዘጸ 1፥ 13-14/

3ኛ፦ ሦስተኛው ደግሞ በመጽሐፍ ቅዱስ ውስጥ የእግዚአብሔር መልአክቶች፣ ባለሟሎቹ፣ አገልጋዮቹ፣ ነቢያቶች፣ ሐዋርያት አጠቃላይ ለመንፈሳዊ አገልግሎት ሲሉ እራሳቸውን ባርያ ብለው በተደጋጋሚ ይጠራሉ። ለመሆኑ እንደ እግዚአብሔር ቃል ለመንፈሳዊ አገልግሎት ይህን ቃል የተጠቀሙትን በአጭሩ እንይ፦

ሊቀ ነበያት ሙሴ፦ “የእግዚአብሔርም ባሪያ ሙሴ” /ኢያ 11፥2/

ሎሌው ኢያሱ፦ “የእግዚአብሔር ባሪያ የነዌ ልጅ ኢያሱ” /መሣ 2፥8/

ንጉሥ ዳዊት፦ “የእግዚአብሔር ባሪያ ዳዊት” /መዝ 36/

ነብየ ኢሳያስ፦ “ባሪያ እሆነው ዘንድ ከማኅፀን ጀምሮ የሠራኝ እግዚአብሔር” /ኢሳ 49፥5/

ነብየ ዳንኤል፦ “የሕያው አምላክ ባርያ ዳንኤል” /ዳን 6፥20/

ነብየ ዘካርያስ፦ “ከታናሽነቴ ጀምሮ ባሪያ ሆኜ ነበርሁና” /ዘካ 13፥5/

ስለ አገልጋዮቹ፦ “በቤተ ሰዎች ላይ የሾመው ታማኝና ልባም ባሪያ ማን ነው?” /ማቴ 24፥45/

ስለ ሐዋርያቶቹ፦ “ከእናንተም ማንም ፊተኛ ሊሆን የሚወድ የሁሉ ባሪያ ይሁን” /ማር 10፥44/

ስለ መልአክቶቹ፦ “የጌታ ባሪያ” /ሉቃ 1፥38/

ቅ/ ጳውሎስ፦ “የኢየሱስ ክርስቶስ ባሪያ ጳውሎስ፤ እንደ ባሪያ ራሴን ለሁሉ አስገዛለሁ።” /ሮሜ 1፥2፣ 1ኛ ቆሮ 9፥19/

ቅ/ ያዕቆብ፦ “የእግዚአብሔርና የጌታ የኢየሱስ ክርስቶስ ባሪያ ያዕቆብ /ያዕ 1፥1/

ቅ/ ይሁዳ፦ የኢየሱስ ክርስቶስ ባሪያ የያዕቆብም ወንድም የሆነ ይሁዳ” /ይሁ 1፥1/

ቅ/ ሚካኤል፦ “የኢየሱስም ምስክር ካላቸው ከወንድሞችህ ጋር አብሬ ባሪያ ነኝ” /ራእ 19፥10/

እንግዲህ ምን እላለሁ? ስለ ጌዴዎንና ስለ ባርቅ ስለ ሶምሶንም ስለ ዮፍታሔምና ስለ ሳሙኤልም ስለ ነቢያትም እንዳልተርክ ጊዜ ያጥርብኛልና። እንዲል ሐዋርያው ቅ/ ጳውሎስ።

ከላይ በጥቂቱ ያየናቸውና ያላየናቸው  ስለ እነዚህ ሁሉ አገልጋይ ባርያዎቹ እግዚአብሔርስ ምን ይላል? “ከባሪያዬ በቀር ዕውር ማን ነው? እንደምልከው መልእክተኛዬስ በቀር ደንቆሮ የሆነ ማን ነው? እንደ ፍጹሙ ወይስ እንደ እግዚአብሔር ባሪያ ዕውር የሆነ ማን ነው?” /ኢሳ 42፥9/ እውነት ነው! እንደ እግዚአብሔር ባሪያ ዕውር የሆነ ኧረ ማን ነው? ሲሰድቧቸው፣ ሲገርፏቸው፣ሲያስሯቸው፣ ለግዞት ሲዳርጓቸው፣ ሲገድሏቸው፤ ስለ ቅድስት ድንግል ማርያም ልጅ ስለ ኢየሱስ ክርስቶስ ፍቅር ሲል እራሱን ባርያ ያደረገ ኧረ ማን ነው?

 ይህን ካደረጉ ብጹአኖች፣ ንጹአኖች፣ ታጋሾች፣ የዋሆዎች፣ ገርሮች፣ ቅኖች፤ የመንፈስ ቅዱስ ባርያ አገልጋዮቹ ማለት እነዚህ ናቸው!!!

እንደ ሰውኛ አስተሳሰብ “ባርያ” የሚለውን ቃል በመምዝ ወደ ተሳሳተ የስህተት ተምህሮ ወደ ማስተማር እንዳንሄድ እውነተኛና ሕያው የሆነው የእግዚአበሔር መንፈስ ያለበት የመጽሐፍ ቅዱስ መልስ ይሄ ነው!

                                  ወ ስብሐት ለእግዚአብሐር!!!