በመልአከ መንክራት ግርማ ወንዱሙ ላይ ማጉረምረም ለምን? ክፍል ፫

በክፍል ሁለት ላይ ያቆምነው፦ «ስለ ከንቱ ውዳሴ እና ከከንቱ ውዳሴ ስለ ለማምለጥ» ነው፤ ካቆምንበት ስንቀጥል፦ እርግጥ ነው ማንኛውም ምዕመን ውዳሴ ከንቱ ከመስጡት መቆጠብ አለበት፣ እንዲሁም ደግሞ ማንኛውም መንፈሳዊ አገልጋይ ስለ መንፈሳዊ አገልግሎቱ ሲል ከውዳሴ ከንቱነት እራሱን መጠብቅ ግድ ይላል!፤ ይህ ታዲያ የሚሆነው በምዕመናን ዘንድ ይሁን በአገልጋዮች ዘንድ የመንፈሳዊነት ልዕልና ሲኖር ነው። በዚሁ «ስለ ከንቱ ውዳሴ እና ከከንቱ ውዳሴ ስለ ለማምለጥ» ስንነጋገር መምህር ግርማ፦ «እኔ አዳኝ አይደለሁም፥ ነኝ ብዬ ተናግሬ፣ ተመፃድቄም አላውቅም፤ አገልግሎት እየሰጠሁ እንጂ! የሚፈስና የሚያድው እግዚአብሔር አምልክ ነው!።» ያሉትን እናስታውስ።

ደግሞም ሁሉም መምህራን፥ ስለ መተተኞች፣ ስለ ጠንቋዮች፣ ስለ ድግምታሞች፣ ስለ ዛር መንፈሶች፣ አጠቃላይ ስለ አጋንት ሥራዎች መኖር ያውቃሉ፤ ስለነዚህ የአጋንት ሥራዎች እንዴት ማስቀረትና ፊቱን ወደ እግዚአብሔር ቤት እንዴት እንደሚመልስ በትምህርታቸው ውስጥ ይሰጣል፤ ቢሆንም ግን አሁን ስለምንነጋገርበት ወደ ጠንቋይና ወደ ቃልቻ ቤት የሚሄደንው፣ ሥራውን በመተትና በጥንቆላ የሚተዳደረውን ወደ እግዚአብሔር ቤት ፊቱን እንዲመልስ እያደረጉ ያሉትን አባት መምህር ግርማን መቃወም ምን የሚሉት ነገር ነው? ደግሞስ እኚሁ አባት፥ ካህናት መብላት ያለባችሁ ቅልጥም ጠንቋዩ እንዳይበላው፣ ካህናት መጠጣት የነበረባችው ጠጅ ጠንቋዩ  እንዳይጠጣው፣ ሕዝቡን እየሰኩ እያስቀሩ፣ ሕዝቡን ፍትፍቱን ወደ ጠንቋይ ቤት መውሰዱን እንዲያቆም እና ወደ ካህኑ እንዲያመጣው እያደረጉ ያሉ አባት ናቸው። ቤተ ክርስቲያንንም በማሳነጽ ረገድም የበኩላቸውን ድርሻ እያደረጉ ነው። እንደውም ስለ ቤተ ክርስቲያንን ማሳነጽ መጋቢ አእላፍ መክብብ አጥናው ያሉትን እናጢነው።

በሸገር ሬድዮ የጨዋታ እንግዳ ተጋባዥ መጋቢ አእላፍ መክብብ አጥናው ከመዓዛ ብሩ ጋር ሲጨዋወቱ ስለ ልመና ሲናገሩ እንዲህ ብለው ነበር፦ «ቤተ ክርስቲያን የሚሰሩ (የሚያገለግሉ) ሠዎች ወንጌል ሰብከው አስተምረው አስተባብረው መስራት ሲችሉ ቃጭል እያቃጨሉ በየመንገዱ ሥዕል ይዘው የሚያካሄዱት ልመና በእውነቱ በጣም አስጸያፊ፣ ቤተ ክርስቲያንንም ሀገርንም የሚያሰድብ ነው። ይህንን ሲኖዶስ አያውቅም፤ ሲኖዶሱ ለምኑ ብሎ አልፈቀደመ። ግን ይሄንን የሚሰሩ የውስጥ ሰራተኞች ምናልባትም በጉቦ እየተደለሉ ሊኾን ይችላል፤ ፍቃድ የሚያገኙበት እንጂ ይሄ ልመና በቤተ ክርስቲያናችን በሲኖዶስ የተወሰነ ነገር አይደለም። ሲኖዶስ የሚያውቀው አይደለም፤ በቤተ ክርስቲያን ሊመካኝ አይችልምና ይሄንን በእውነቱ መንገዱን መምራት ያስፈልጋል። ወንጌልን ሰብከው ነው እንጂ ቤተ ክርስቲያን መስራት ያለባቸው ተለምኖ  አይደለም!። ደግሞ ለምነውስ የለመኑት ገንዘብ በሥራ ላይ መዋሉ ምን ዋስትና አለ? ልመና እንደ ሥራ፣ እንደ መተዳደሪያ ኾኗል እና በቤ ክርስቲያኒቱ የራሷን ካህናት ሆነ መነኮሳት የምታስተዳድርበት በቂ ሃብት አላት፤ የተፈጥሮ ሃብት አላት፥ ያንን ሙያዊ ሥልጣኔ /Technology/ ማሰማመርና መልክ እንዲኖረው አድርጎ፣ እንዲዳብር አድርጎ በእርሻውም እራስን ችሎ ሌላውን ለመርዳት መዘጋጀት ያስፈልጋል።» ያሉት ድንቅ አባባል መምህር ግርማ ቤተ ክርስቲያንንም በማሳነጽ ረገድም የበኩላቸውን ተሳትፎ  እያደረጉ እንደኾነ  እንገነዘባለን።

ውድ የምናከብረውና የምንወድው ወንድማችን ዲያቆን ዳንኤል ክብረት፦ በተራ ቁጥር 3 ላይ ያሰቀመጠው ሐሳብ፦ «በዘመኑ አጥማቂዎች ዘንድ የምናየው ግን ከዚህ በተቃራኒው ነው፡፡ በክርስቶስ ስም የማይወጣው ሰይጣን የቅዱስ ሚካኤልን ስም ሲጠሩበት ይወጣል፡፡ በክርስቶስ ስም የሚያሾፍ ሰይጣን የድንግል ማርያምን ስም ሲጠሩበት ተቃጠልኩ ይላል፡፡ ይኼ ፈጽሞ ክህደት ነው፡፡ የቤተ ክርስቲያንም ትምህርት አይደለም፡፡ ‹‹በስመ ሥላሴ እቀጠቅጥ ከይሴ›› ብላ ያስተማረች ቤተ ክርስቲያን ላይ ‹‹በክርስቶስ ስም አንወጣም፣ በማርያም ስም ግን እንወጣለን›› እያለ አጋንንት ወጣ የሚል ትምህርት ማስፋፋት ክህደት ነው፡፡» ተብሎ የተጻፈው ጹሑፍ መምህር ግርማን ይመለከታቸዋል የሚል እምነት የለኝም። ምክንያቱ ደግሞ መምህ ግርማ፦ ስለ ፃድቃን፣ ስለ መልአክት ተራዳኢነት፣ ስለ ቅዱሳን በረከት፣ ስለ ድንግል ማርያም ክብር በብዙ መልክ አስተምረዋል፤ ይህም ያስተማሩት ትምህርት ወንድማችን ዲያቆን ዳንኤል በተራ ቁጥር 3 ላይ ያሰፈረው ሐሳብ በፍጹም አይመለከታቸውም።

ቢሆንም ግን ለእኔ በተራ ቁጥር 3 ላይ ያሰቀመጠው ሐሳብ፦ ልክ መናፍቃን እንደሚሉን አይነት ኾኖብኛል፤ ጥያቄም እንድጠይቅ ያስገድደኛል በእመቤታችን በቅድስት ድንግል ማርያም ስምና በቅዱሳን ስም ሰይጣን አይቃጠልም ማለት ነውን? በእነዚህ በእግዚአብሔር አገልጋዮች በቅዱስ ሚካኤል ስምስ አጋንት አይገሰጽም ማለት ነውን? ይሄንኑስ መናፍቃን ይሉት አይደለንም? ይሄ የቀረበው ሐሳብ ለመናፍቆች የሚመች አይመስላችሁንም??? የቱ ክርስቶስ ነው የሚሾፍበት? መናፍቃን አማላጅ የሚሉትን ነውን ወይንስ ሙስሊሞች መሲህ የሚሉት? እኛ ኦርቶዶክስ ተዋሕዶ ክርስቶስን እንዲህ  ብላ እንጠራዋለን፦ ክብሩ ይስፋና፥ አዶናይ፣ አልፋና ዖሜጋ፣ አማኑኤል፣ የታረደው በግ፣ የዳዊት ልጅ፣ የናዝሬቱ ኢየሱስ የድንግል ልጅ፣ መድኅነ ዓለም ኢየሱስ ክርስቶስ እርሱ ልዑል እግዚአብሔር ነው። ቤተ ክርስቲያን ስለክርስቶስ ያስተማረችን እንዲህ ነው!።

ኦርቶዶክስ ተዋሕዶ  ቤተ ክርስቲያናችን ያስተማረችን፣ በመጽሐፍ ቅዱስ ውስጥ የተመዘገበ፣ በትውፊትና በትርጓሜ ያለ ነው። በመጽሐፍ ቅዱስ ውስጥ የተመዘገበው ቃሉስ፦ ለቅዱሳን መላእክት እንዲህ ይል አይደል ወይ? እግዚአብሔር አምላክ ለወዳጆቹ እንዲህ ይላል:- «በመንገድ ይጠብቅህ ዘንድ ወዳዘጋጀሁትም ስፍራ ያገባህ ዘንድ፥ እነሆ፥ እኔ መልአክን በፊትህ እሰድዳለሁ። በፊቱ ተጠንቀቁ፥ ቃሉንም አድምጡ ስሜም በእርሱ ስለ ሆነ ኃጢአት ብትሠሩ ይቅር አይልምና አታስመርሩት።» /ዘጸ 23፥ 20-21/ ልብ በሉ!። እግዚአብሔር መልአኩን በፊታችን ሲልክ ምን ምን ማድረግ እንድሚጠበቅብን ሲያስጠነቅቀን:- በፊቱ ተጠንቀቁ፥ ቃሉንም አድምጡ «ስሜም በእርሱ ስለ ሆነ» ብሎ ነው ያስተማረን። በመጽሐፈ መሣፍንት ደግሞ የሶምሶን አባት ማኑሄ ለሚስቱም፦ መልአኩን ስለማየቱ "እግዚአብሔርን አይተናልና ሞት እንሞታለን" /13፥ 23/ ነው ያላት። በእርግጥ ማኑሄ እግዚአብሔር አይተናልና ሞት እንሞታለን ለምን አለ? መልአኩን አይተናልና ለምንስ አላለም? በተጨባጭ ይህ የሚያስረዳን ነገር የእግዚአብሔርን መልአክቶቹን ከሥልጣናቸውና ከሥማቸው የተነሳ በስማቸው ውስጥ የእግዚአብሔር ስም ስላለ እግዚአብሔርን አይተናልና ብለው መስክረዋል።

ይህንንም ለማረጋገጥ ካስፈለገን የሐዲስ ኪዳን ኪሩቤል የጌታችንና የመድኃኒታችን የኢየሱስ ክርስቶስ እናት ቅድስት ድንግል ማርያም የመልአኩ ቅዱስ ገብርኤልን ቃል በሰማች ከንግግሩ "ይህ እንዴት ያለ ሰላምታ ነው?" ባለች ጊዜ በመልአኩ ቅዱስ ገብርኤል ስም ውስጥ የእግዚአብሔር ስም ስላለ ከትህትናው የተነሳ በጣም ተደነቀች። /ሉቃ 1፥ 26-38/ ስለዚህ ይህ የትህትና መንፈስ ደግሞ የእግዚአብሔር ነው። እግዚአብሔር ደግሞ በመልአክቶቹ አድሮ ያናግራል፣ ይታያል፣ ሥራውን ይፈጽማል፤ ስሙም በመልአክቶቹ ውስጥ ስለሆነ በመንገዳች ይጠብቁን ዘንድ እግዚአብሔር ወዳዘጋጀው ስፍራ ያገቡን ዘንድ፥ እነሆ፥ እርሱ ከፊታችን መልአክቱን ይላክልን።

በቅዱሳን መላእክት ላይ ያለ' ስም የእግዚአብሔር ስም አይደል እንዴ? አባቶቻችንስ ሲያስተምሩን ስለ መልአክት የእግዚአብሔር ስም እንዳለበት ነው። ለዚህም ነው እንዲህ የሚሉት፦ ሚካኤል ማለት፥ ሚ ማለት መኑ፤ ካ ማለት ከመ፤ ኤል ማለት አምላክ ማለት ሲሆን፤ በአንድነት ሲነበብ መኑ ከመ አምላክ (እንደ እግዚአብሔር ያለ ማን ነው) ማለት ነው። ይህ ታላቅ መልአክ ዮሐንስ ወንጌላዊ በዕራዩ ‹‹በእግዚአብሔር ፊት የሚቆሙትን ሰባቱን መላእክት አየሁ›› ብሎ ከተናገረላቸው መላእክት ውስጥ የሚመደብ ሲሆን የሰባቱም ሊቃነ መላእክት አለቃ እንዲሆን እግዚአብሔር መርጦ ሹሞታል። እንግዲህ የመላእክት ስም ላይ የእግዚአብሔር ስም እንዳለበት ልብ በሉ። ስለዚህ መምህር ግርማ በኢየሱስ ክርስቶስ ስም የሚሾፉ ሳይኾኑ በሥላበ ስም፣ በኢየሱስ ክርስቶስ ስም፣ በቅድስ ድንግል ማርያም ስም እና በቅዱስ ሚካኤል ስም፤ አጋንትን የሚገስጹ ናቸው እንጂ።

ይቆየን፤ ይቀጥላል . . .